Зміцер Бандарэнка: анучы НКВД не схаваеш пад дарагім заходнім касцюмам
- 2.03.2016, 16:31
«Інфармацыйная вайна» Шуневіча азначае, што беларускі народ актыўна супраціўляецца метадам НКВД.
Пра гэта ў інтэрв'ю charter97.org заявіў каардынатар грамадзянскай кампаніі «Еўрапейская Беларусь» Зміцер Бандарэнка, каментуючы выказванне кіраўніка МУС Ігара Шуневіча аб тым, што супраць міліцыі вядзецца «інфармацыйная вайна».
- Як чалавек, які непасрэдна сутыкнуўся з метадамі «работы» Ігара Шуневіча і ягоных падначаленых пасля Плошчы 2010 года, як вы ацэньваеце гэта выказванне міністра?
- Немагчыма сабе ўявіць, што на якім-небудзь нацыянальным свяце Нямеччыны побач з Ангелай Мэркель раптам бы з'явіўся чалавек у форме СС або гестапа.
Але міністр унутраных спраў Шуневіч на вайсковым парадзе стаяў побач з фармальным кіраўніком краіны ў форме НКВД - структуры, якая знішчыла грамадзян сваёй краіны нашмат больш, чым гестапа. І, як вядома з гістарычных дакументаў, у перыяд сяброўства паміж Сталінам і Гітлерам навучала гестапаўцаў метадам барацьбы з уласным насельніцтвам.
Па-другое, калі такі чалавек, як Шуневіч, які прайшоў за апошнія пяць гадоў шлях ад палкоўніка да генерал-лейтэнанта, распавядаць пра «інфармацыйную вайну» супраць яго міністэрства - гэта камплімент для беларускага народа, беларускіх журналістаў і беларускай грамадзянскай супольнасці, якія супраціўляюцца метадам НКВД-МУС пад кіраўніцтвам Шуневіча.
Гэта значыць, што людзі цяпер больш актыўна абараняюць свае правы, праяўляюць грамадзянскую салідарнасць і пераадольваюць страх, крытыкуючы метады беларускіх спецслужбаў, у тым ліку і МУС.
- У сваёй заяве Шуневіч прыстрашыў судовымі позвамі супраць журналістаў. На вашу думку, гэта можа азначаць новы віток рэпрэсій супраць незалежных СМІ?
- Хутчэй, гэта спроба не перашкодзіць аперацыі ў вымантачванні заходніх крэдытаў. Каб для заходніх палітыкаў гэта выглядала так: мы душым сваю апазіцыю і журналістаў сваімі метадамі, а вы не лезьце ў нашы справы.
Я хачу сказаць, што міністр Шуневіч - гэта кандыдат на лаву падсудных у Гаажскі трыбунал. Таму што гэты чалавек удзельнічаў у арганізацыі катаванняў кандыдатаў у прэзідэнты і чальцоў іх штабоў у 2010-2011 гадах. Гэты чалавек ведаў, што ў турме КДБ «Амерыканка» адбываюцца незаконныя дзеянні, якія можна ахарактарызаваць як катаванні.
Адзін прыклад: з камер зняволеных былі вынесеныя правілы ўнутранага распарадку, а да ўсіх зняволеных было даведзена, што «закон цяпер на вас не распаўсюджваецца». І сам Шуневіч інкогніта ў большасці выпадкаў удзельнічаў у катаваннях і допытах, у тым ліку жанчын у начны час, нават не прадстаўляючыся, хто ён.
Санкцыі цяпер знятыя з чыноўнікаў, а большасць «чорнага спісу» складалі як раз супрацоўнікі сілавых структур, у тым ліку і Дэпартамента выканання пакаранняў, якім цяпер кіруе Шуневіч, людзі з гэтых міністэрстваў апомніліся і спрабуюць рабіць з сябе цывілізаваных грамадзян. Тым часам, ДВП - гэта сетка турмаў і канцлагераў, якімі пакрытая ўся Беларусь.
Але анучы НКВД не схаваеш нават пад дарагім заходнім касцюмам - яны ўсё адно тырчаць з-пад яго.