СМІ: Прычынай сутыкнення цягнікоў у Нямеччыне стаў чалавечы фактар

• 10.02.2016, 9:31

Адзін з дыспетчараў адключыў аўтаматычную сігнальную сістэму.

Прычынай аварыі ў Нямеччыне, у выніку якой сутыкнуліся цягнікі, паводле папярэдніх звестак стаў чалавечы фактар.

Пра гэта паведамляе Redaktions Netzwerk Deutschland.

«Адзін з дыспетчараў адключыў аўтаматычную сігнальную сістэму, каб прапусціць цягнік, што спазняўся, «уручную». Ён павінен быў трапіць на разгалінаванне шляхоў своечасова і пры гэтым адысці ад сустрэчнага цягніка. Аднак ён не паспеў да прызначанага часу, а другому цягніку далі зялёнае святло. Першы цягнік паехаў паводле ўказання дыспетчара, нягледзячы на тое, што гарэла чырвонае святло», - цытуе паведамленне «Украінская праўда».

Пры гэтым адзначаецца, што афіцыйнага пацверджання гэтай інфармацыі не было.

Як вядома, у выніку лабавога сутыкнення двух пасажырскіх цягнікоў у Верхняй Баварыі загінулі 10 чалавек.

Яшчэ больш за 80 чалавек атрымалі раненні, 18 з іх - цяжкія. Грамадзян Украіны сярод загінулых і цяжкапараненых няма.