Галоўны метэаролаг Беларусі: У выходныя будзе адліга

• 9.12.2016, 20:55

Дзмітрый Рабаў расказаў аб надвор'і, што чакае беларусаў найбліжэйшыя выходныя дні.

Начальнік службы гідраметэаралагічных прагнозаў Рэспубліканскага цэнтра гідраметэаралогіі, кантролю радыеактыўнага забруджвання і маніторынгу навакольнага асяроддзя Мінпрыроды Дзмітрый Рабаў распавёў «Еўрарадыё» аб надвор'і, што чакае беларусаў найбліжэйшыя выходныя дні. У суботу і нядзелю ў нашай краіне захаваецца адліга.

«У выходныя аматарам зімовых тыпаў спорту давядзецца часова пра іх забыцца, таму што будзе адліга. На большай частцы тэрыторыі нашай краіны чакаюцца ападкі ў выглядзе дажджу і мокрага снегу. Месцамі снег зусім знікне. Уначы тэмпература паветра будзе ад мінус 2 да плюс 5 градусаў, удзень — ад мінус 1 на паўночным усходзе да плюс 6 градусаў», - паведаміў Рабаў.

У пачатку наступнага тыдня адлігу зменіць пахаладанне. Уначы тэмпература паветра пры прасвятленнях будзе дасягаць 15 градусаў марозу.