Беларус сабраў €50 тысяч на «бясконцую» крыніцу энэргіі
- 9.12.2016, 10:44
Праект з беларускімі каранямі HandEnergy апублікаваны на краўдфандынгавай пляцоўцы Kickstarter.
Кісцевы трэнажор HandEnergy трэба круціць у руцэ. У выніку кручэння прылады выпрацоўваецца электрычнасць. Дзякуючы чаму праз USB да яго можна падключыць смартфон або іншы гаджэт і папоўніць зарад батарэі.
Унутры HandEnergy знаходзіцца металічны ротар. На USB-выхад падаецца напружанне 5 вольт і ток сілай у 1 ампер. Вага гаджэта — 380 грамаў, дыяметр – блізу 70 мм, ёмістасць батарэі — 980 маг. Прылада дазваляе зараджаць смартфоны, планшэты, экшэн-камеры і мноства іншых прылад, піша rynak.by.
У якасці месцазнаходжання каманды праекту на Kickstarter паказаны горад Дублін. Аднак карані ў праекта беларускія: стваральнік HandEnergy — гамяльчук Міхаіл Вага.
На краўдфандынгавай пляцоўцы адну прыладу HandEnergy можна замовіць за 69-119 еўраў, даставіць яе абяцаюць арыентыровачна ў траўні 2017 года. Аптовы кошт за 10 адзінак складае 599 еўраў.
Заяўленая сума збору на фінансаванне праекта — 50 тысяч еўраў. Унікальнае зарадная прылада ўжо сабрала 52 318 еўраў. Збор сродкаў завершыцца 23 снежня.