Трамп стане прадусарам рэаліці-шоў Шварцэнэгера

• 9.12.2016, 9:30

Абраны прэзідэнт ЗША Дональд Трамп стане выканаўчым прадусарам рэаліці-шоў «Вучань знакамітасці» на тэлеканале NBC.

Пра гэта паведамляе Variety.

Гэтую інфармацыю выданню пацвердзілі на кінастудыі Metro-Goldwyn-Mayer Pictures, якая выпускае праграму.

Трамп быў вядучым гэтага шоў з 2005-га да 2015 года. У ліпені тэлеканал NBC скасаваў кантракт з ім праз скандальныя заявы ў адрас мігрантаў. Новым вядучым стаў актор, экс-губернатар ЗША Арнольд Шварцэнэгер. Характэрна, што ў кастрычніку Шварцэнэгер заяўляў, што не будзе падтрымліваць Трампа на выбарах.

Абраны прэзідэнт будзе атрымліваць не менш як $100 тыс. за адзін эпізод шоў.

Як адзначае выданне, тое, што будучага кіраўніка Белага дома прынялі на працу – з'яўляецца экстраардынарным, бо можа выклікаць канфлікт інтарэсаў.

Новы сезон рэаліці-шоў пачнецца 2 студзеня 2017 года.