Два «срэбры» здабылі беларускія фехтавальшчыкі на турніры ў Аўстрыі

• 6.12.2016, 15:18

Дзяніс Паўлоўскі перамог на фехтавальнай дарожцы двух італійцаў.

Дзве срэбраныя ўзнагароды здабылі беларускія фехтавальшчыкі на моладзевым (U-23) міжнародным турніры ў аўстрыйскім Медлінгу, паведамляе БелТА.

У турніры шпажыстаў другое месца заняў беларус Дзяніс Паўлоўскі, які на шляху да фіналу паспяхова пераадолеў кваліфікацыйныя паядынкі. Ён змог перамагчы на фехтавальнай дарожцы двух італійцаў Джанлуку Касара (15:14) і Амадэа Занканэлу (15:7).

Толькі ў фінале Дзяніса Паўлоўскага перамог Трыстан Тулен з Нідэрландаў (09:15). У спаборніцтве сярод дзяўчат у рапіры беларуска Яна Андрэенка была мацнейшай за Барбару Бем з Аўстрыі (15:6), але ў паядынку за залатую ўзнагароду саступіла італійцы Марыі Пачэлі (14:15). Турнір у Аўстрыі з'яўляецца этапам Еўрапейскай моладзевай серыі. Наступны этап для фехтавальшчыкаў ва ўзросце да 23 гадоў адбудзецца з 7 да 8 снежня ў вугорскім горадзе Татабанья, дзе найлепшага вызначаць шпажысты.