Чатыры пытанні да міністра Шуневіча
- 4.12.2016, 15:29
Апошнія выступы кіраўніка МУС пакінулі вострае пачуццё незавершанасці.
На некалькі дзён міністр МУС Беларусі Ігар Шуневіч стаў галоўным ньюс-мейкерам краіны. Ён распавядаў беларусам пра каляровыя рэвалюцыі, «дэтэктары хлусні» і нават хакей, але так і не адказаў на шэраг галоўных пытанняў.
Для пачатку навіны, якія пакінулі пачуццё незавершанасці, піша «Салідарнасць».
1. 1 снежня Ігар Шуневіч падняў тэму «інфармацыйнай вайны» супраць МУС і распавёў пра «каляровыя рэвалюцыі», якія пачыналіся з дыскрэдытацыі ўлады.
2. За смяротнае ДТЗ начальнік Баранавіцкай ДАІ звольнены з органаў.
3. Траціну супрацоўнікаў ДАІ, правераных на дэтэктары хлусні, звольняць з органаў.
4. Ігар Шуневіч прыстрашыў адстаўкай кіраўніцтва хакейнага «Дынама», «калі каманда не пачне паказваць гульню».
Пасля гэтых навінаў хацелася б задаць міністру чатыры галоўныя пытанні.
1. Як 30% супрацоўнікаў ДАІ, якія не прайшлі праверку на паліграфе, трапілі ў органы, і хто за гэта панясе адказнасць?
2. Чаму пасля інцыдэнту з п'яным супрацоўнікам ДАІ, кіраўніцтва МУС, уключна з самім Шуневічам, не падало ў адстаўку?
3. Ці мае пасля гэтага міністр права пагражаць звальненнем кіраўніцтву хакейнага клуба за адсутнасць вынікаў?
4. І чаму за правалы ў краіне Шуневіч патрабуе не адстаўкі кіраўніцтва, а шукае арганізатараў «каляровых рэвалюцый» і «інфармацыйных войнаў»?