У Менску гарэў Трактарны завод
- 10.11.2016, 17:01
Узгаранне адбылося ў сутарэнным памяшканні сталеліцейнага цэха МТЗ.
Увечары 10 лістапада ў ліцейным цэху Мінскага трактарнага завода адбылося ўзгаранне. Як распавялі відавочцы, на месца выбыла амаль два дзясяткі машын МНС, а таксама медыкі. З агнём змагаліся больш за гадзіну, паведамляе tut.by.
«Паступіла інфармацыя пра ўзгаранне ў адным з цэхаў МТЗ. Супрацоўнікі МНС прыбылі на месца», — пацвердзілі ў прэс-службе Управы МНС Менску.
Пазней высветлілася, што ўзгаранне адбылося ў сутарэнным памяшканні сталеліцейнага цэха МТЗ. Пажар ліквідаваны, пацярпелых няма.
Нагадаем, што 7 кастрычніка Зміцер Дашкевіч, і актывісты «Маладога фронту» сарвалі «ўрачыстае» адкрыццё новага помніка Леніну каля МТЗ у Менску.