Рублёвыя крэдыты стануць яшчэ даражэйшыя?
- 1.09.2015, 10:45
Дэвальвацыя беларускага рубля прымусіць Нацбанк павялічыць стаўкі крэдытаў.
Гэта будзе зроблена, каб спыніць спекулятыўны попыт на рэсурсы з боку насельніцтва і прадпрыемстваў.
«Працэнтныя стаўкі ў новых крэдытах могуць быць павялічаныя да 40-45% да моманту новай стабілізацыі сітуацыі на валютным рынку і скарачэння попыту на рублёвыя рэсурсы», - мяркуюць экспэрты «Беларусь у фокусе».
Па іх жа прагнозах, працэнтныя стаўкі дэпазітаў для прыцягнення рэсурснай базы могуць перавысіць узровень 30%.
Нацбанк вымушаны карэктаваць тактыку паступальнага зніжэння працэнтных ставак у банкаўскай сістэме. Прычына - рэзкае зніжэнне рублёвай ліквіднасці пасля значнага паслаблення курсу нацыянальнай валюты да даляра ЗША і еўра, піша «Заўтра тваёй краіны».
Пазычальнікі разлічваюць на істотнае абясцэньванне выплат у абслугоўванні і вяртанні рублёвых крэдытаў.
Насельніцтва павялічыла попыт на спажывецкія крэдыты для набыцця тавараў, спадзеючыся на захаванне жорсткага кантролю над коштамі з боку Мінгандлю.
Юрыдычныя асобы сталі актыўна прыцягваць крэдыты, каб затым канвертаваць іх у замежную валюту. Пра гэта сведчыць рэзкае павелічэнне аб'ёму таргоў на валютным рынку.
Закрыццё ўкладчыкамі рублёвых дэпазітаў прывяло да лакальных праблемаў з наяўнасцю валюты ў абменных пунктах і пагаршэння ліквіднасці банкаў. Некаторыя з іх былі вымушаныя ўвесці абмежаванні ў выдачы крэдытаў. «Прытоку рублёвых дэпазітаў з боку насельніцтва ў гэтай сітуацыі чакаць не трэба, што азначае адсутнасць магчымасці для банкаў працягнуць практыку выдачы недарагіх крэдытаў», - адзначаецца ў аглядзе «Беларусь у фокусе».
З 1 верасня меркавалася распаўсюдзіць дзеянне абмежаванняў у працэнтных стаўках на крэдытныя дамовы, заключаныя да 1 чэрвеня 2015 года.
Аднак ва ўмовах рэзкага попыту на рублёвыя рэсурсы Нацбанк адмовіцца ад прымянення санкцый у дачыненні да банкаў, якія не перагледзелі працэнтную палітыку. Абмежаванні па крэдытных стаўках могуць быць альбо скасаваныя, альбо прыпыненыя, прагназуюць экспэрты.