Сяргей Міхалок і BRUTTO выступяць на ўкраінскім «Бандэрштаце»
- 31.07.2015, 9:29
31 ліпеня - 2 жніўня ва ўкраінскім Луцку пройдзе фестываль «Бандэрштат».
Мерапрыемства збірае патрыётаў з усёй Украіны, а таксама з Беларусі і іншых краін у дзевяты раз, паведамляе «Радыё Рацыя».
Сябра аргкамітэта фестывалю Павел Данільчук адзначае, што мэтай правядзення «Бандэрштату» з'яўляецца папулярызацыя ўкраінскай нацыянальнай ідэі.
- Гэта папулярызацыя ўсяго ўкраінскага - у першую чаргу патрыятычнай ідэі, папулярызацыя ўкраінскай героікі, гісторыі. У першую чаргу - гэта вобраз Сцяпана Бандэры, як лідара ўкраінскіх нацыяналістаў у свой час, лідара Арганізацыі ўкраінскіх нацыяналістаў. Гэта папулярызацыя герояў Украінскага паўстанцкага войска, - сказаў ён.
Штогод на «Бандэрштат» прыязджае шмат беларусаў. А на вялікай музычнай сцэне адзін з рок-гуртоў традыцыйна прадстаўляе Беларусь. Сёлета хэдлайнерам трэцяга фестывальнага дня будзе BRUTTO.