Макейн нагадаў пра патрэбу адмовы ад ракетных рухавікоў з РФ

• 30.06.2015, 10:26

Аварыя ракеты Falcon 9 не павінна паўплываць на намер ЗША адмовіцца ад выкарыстання расейскіх рухавікоў РД-180.

Пра гэта заявіў сенатар-рэспубліканец Джон Макейн, паведамляе Lenta.ru са спасылкай на Reuters. «Тое, што адбылося ніякім чынам не павінна паўплываць на патрэбу адмовы ад расейскіх ракетных рухавікоў», - адзначыў сенатар. З ягоных слоў, гэтая «няўдача не зможа перашкаджаць будучаму поспеху кампаніі SpaceX і яе здольнасці падтрымліваць нацыянальную бяспеку ЗША ў касмічнай вобласці».

Раней віцэ-прэм'ер Дзмітрый Рагозін заклікаў ЗША перагледзець сваю пазіцыю па санкцыях у дачыненні да Раскосмаса, спаслаўшыся на матэрыял пра наступствы аварыі амерыканскага грузавога касмічнага карабля Dragon.

Амерыканская ракета Falcon 9 з грузавіком Dragon кампаніі SpaceX, якая стартавала 28 чэрвеня да Міжнароднай касмічнай станцыі, выбухнула на трэцяй хвіліне пасля ўзлёту. Яна несла каля двух тон грузу для МКС. Карабель павінен быў даставіць на станцыю каля двух тон грузаў, прадукты харчавання, абсталяванне і матэрыялы для навуковых эксперыментаў.

Нагадаем, 3 чэрвеня Пентагон абвясціў конкурс на стварэнне амерыканскага аналага расейскага ракетнага рухавіка РД-180, які выкарыстоўваецца на носьбітах Atlas V. Заяўкі ад удзельнікаў павінны паступіць да 23 чэрвеня, а вынікі конкурсу падвядуць у верасні.