Берасцеец выкапаў у сваім агародзе кілаграм ртуці

• 23.06.2015, 10:59

Мужчына спрабаваў выкапаць слуп, а выявіў гумовую ёмістасць з невядомым рэчывам, падобным на ртуць.

Пра гэта charter97.org паведамілі ў прэс-службе МНС.

«У Берасцейскае УМНС паступіла паведамленне аб выяўленні на тэрыторыі прыватнага домаўладання ў Берасці пры правядзенні земляных работ гумавай ёмістасці з невядомым рэчывам, падобным на ртуць. Пасля прыбыцця да месца выкліку аддзялення пажарнага аварыйна-выратавальнага атрада УМНС было ўстаноўлена, што гаспадар домаўладання пры правядзенні земляных работ (выкопванне слупа), выявіў эмаляваны чайнік, усярэдзіне якога знаходзілася гумовая ёмістасць са ртуццю. Пры выманні ёмістасці з чайніка адбыўся разліў ртуці на плошчу блізу 0,1 м. кв.

Работнікі МНС сабралі пралітую ртуць у колькасці 25 грамаў, правялі дэмеркурызацыённыя працы. Гумовая ёмістасць са ртуццю агульнай вагой блізу 1000 грамаў была канфіскаваная.

Забруджванне навакольнага асяроддзя не адбылося, пацярпелых няма. Праверку паводле факту выяўлення ртуці праводзяць работнікі АУС адміністрацыі Маскоўскага раёна Берасця», - адзначылі там.