Спадарожнік на сонечных ветразях зрабіў першыя фатаграфіі

• 2.06.2015, 19:21

Навукоўцы атрымалі першыя фатаграфіі са спадарожніка LightSail, які працуе на сонечных ветразях.

Два малюнкі атрыманыя бартавой камерай апарата, паведамляецца на сайце планетарнага грамадства, паведамляе Lenta.ru.

Здымкі прынятыя наземнай станцыяй 1 чэрвеня 2015 года а 17:00 паводле паўночнаамерыканскага ўсходняга часу (00:00 паводле маскоўскага часу), калі спадарожнік пралятаў над наземнай станцыяй, якая праводзіць назіранні за LightSail.

Цягам 11 хвілін на хуткасці 9600 біт у секунду станцыя прымала звесткі ад апарата. Такая нізкая хуткасць перадачы інфармацыі паслужыла прычынай нізкай якасці атрыманых малюнкаў. Чакаецца, што падчас наступнага пралёта фатаграфіі загрузяцца ў лепшай якасці.

Раскрыццё сонечных ветразяў на спадарожніку LightSail павінна было прайсці 2 чэрвеня. Аднак гэтую працэдуру перанеслі на суткі. Раней, 30 траўня, навукоўцам пасля перазагрузкі сістэмы ўдалося наладзіць сувязь з LightSail, якая была страчаная праз праграмныя памылкі.

Апарат складаецца з чатырох сонечных ветразяў трохкутнай формы і трох спадарожнікаў CubeSat. Мяркуецца, што ў рух спадарожнік будзе прыводзіцца пад дзеяннем ціску сонечнага святла, падобна таму як пры дапамозе ветру па вадзе перамяшчаюцца ветразі. Агульная плошча сонечнага ветразя, вырабленага з майлару, роўная 32 квадратным метрам.

На арбіту LightSail быў запушчаны 20 траўня 2015 года пры дапамозе ракеты-носьбіта Atlas V. Разам з ім на арбіту былі адпраўленыя яшчэ сем спадарожнікаў CubeSat, а таксама сакрэтны карабель ВПС ЗША Boeing X-37.

Няўрадавае Планетарнае таварыства заснаванае ў 1980 годзе Карлам Саганам, Луісам Фрыдманам і Брусам Мюрэем. Яно займаецца падтрымкай і папулярызацыяй даследаванняў космасу, стварэння транспартных сродкаў і касмічнай палітыкай. Дагэтуль чальцамі грамадства з'яўляюцца блізу 40 тысяч чалавек.