Побач з «Уэмблі» знайшлі бомбу часоў Другой сусветнай вайны

• 22.05.2015, 17:49

Побач з лонданскім футбольным стадыёнам «Уэмблі» выяўленая нявыбухнутая нямецкая бомба часоў Другой сусветнай вайны.

Экспэрты ў абясшкоджванні выбуховых прылад ужо працуюць на месцы. Людзі з жылых і адміністрацыйных будынкаў, якія знаходзяцца ў радыусе 400 метраў, эвакуяваныя, піша Lenta.ru.

Набой быў знойдзены будаўнікамі, якія праводзяць рамонтныя работы побач з арэнай. На разміноўванне можа спатрэбіцца тыдзень. Правядзенне матчаў, якія павінны адбыцца на стадыёне найбліжэйшым часам, пад пагрозай. 30 траўня на «Уэмблі» павінен адбыцца фінал Кубка Англіі, у якім сустрэнуцца «Арсэнал» і «Астан Віла».

Першы стадыён «Уэмблі» быў пабудаваны ў 1923 годзе і праіснаваў да 2000 года. Праз сем гадоў на яго месцы адкрылася новая аднайменная арэна, дзе праходзяць хатнія матчы каманды Англіі і фіналы Кубка краіны.