Ля будынку Запарожскай АДА ўначы адбыўся выбух

• 26.03.2015, 11:03

Каля будынку Запарожскай абласной дзяржаўнай адміністрацыі ўначы 26 сакавіка адбыўся выбух.

Пра гэта РБК-Украина паведаміў кіраўнік прэс-службы УМУС у Запарожскай вобласці Аляксандр Ваўкадаў.

«26 сакавіка а 01:24 у Арджанікідзаўскую РА ГУМУС паступіла паведамленне ад дзяжурнага УСБУ ў Запарожскай вобласці аб тым, што з левага боку будынка Запарожскай аблдзяржадміністрацыі каля падмурка адбыўся выбух неўсталяванага выбуховага прыстасавання. З прычыны выбуху пашкоджана шкло на ўваходных дзвярах. На месца здарэння выехалі кіраўнікі ГУ МУС, выбуха-тэхнічная служба, крыміналістычная лабараторыя, кіналагічная служба і следча-аператыўная група райаддзела ў поўным складзе», - паведаміў Ваўкадаў.

Паводле папярэдніх звестак, адбыўся выбух самаробнай выбухной прылады. Будынак АДА не пашкоджаны, пацярпелых няма. Звесткі пра падзею ўнесеныя ў Адзіны рэестр дасудовых расследаванняў паводле ч. 4 арт. 296. (асабліва злоснае хуліганства).