Сланяня з Тайланда парадавала інтэрнэт воднымі трукамі (Відэа)

• 20.03.2015, 11:44

Карыстальнікаў інтэрнэту парадавала тайскае сланяня, якога спрабуюць выкупаць супрацоўнікі мясцовага заапарка.

Ролік на партале YouTube.com размясціў Клаўс Ёргенс, які падарожнічаў у гарачай краіне і зафатаграфаваў на камеру сланяня, піша krsk.sibnovosti.ru.

Маленькі і яшчэ нязграбны слон, узрадаваўшыся водным працэдурам, губляе раўнавагу і падае на бок наўпрост у сваёй чырвонай ванне. Ён плёскаецца і боўтаецца, пасля чаго ператварае купанне ў гульню: сланяня вылазіць з ванначкі, каб пасля зноў туды заваліцца і паплюхацца. Гэтую працэдуру яно паўтарае некалькі разоў.

Запіс "Вялікая праблема", а менавіта так назваў відэа Клаўс Ёргенс, усяго за некалькі дзён паспеў сабраць больш за 1,6 мільёна праглядаў. Карыстальнікі на купанне сланяняці адрэагавалі па-рознаму: хтосьці выказаў спачуванне жывёліне, што жыве ў няволі, хтосьці ж пасмяяўся і парадаваўся разам з маленькім сланом.