Жыхарам Салігорска прапанавалі выбраць паміж Беларуссю і «рускім светам»

• 18.03.2015, 14:52

Плакаты «Зрабі правільны выбар» з'явіліся ў грамадскіх месцах Салігорска, а таксама на прыпынках і аб'явах.

Пра гэта сайту charter97.org распавялі жыхары горада.

У плакатах супрацьпастаўляюцца сімвалічныя вобразы. З аднаго боку - гэта Беларусь, а менавіта - свабодалюбівы зубр, вышыванка, нацыянальны герой Каліноўскі і рок-музыка Сяргей Міхалок. З іншага боку, гэта сённяшні «рускі свет» у выглядзе мядзведзя з аўтаматам, імперскай сімволікі, Іосіфа Кабзона, які спявае з лідарам «ДНР», русіфікатара Беларусі Міхаіла Мураўёва.

«Гэтымі плакатамі мы хацелі паказаць пагрозу новай хвалі расейскага нацыяналізму, калі адкрыта гучаць заклікі да аб'яднання Украіны, Беларусі і Расеі пад міфічным брэндам «рускі свет». На прыкладзе ўсходняй Украіны мы бачым, якім спосабам праходзіць гэтая інтэграцыя. Мы спадзяемся, што не толькі наша грамадства, але і ўлады ўсведамляюць небяспеку з боку ўсходняй суседкі, дзе Беларусь не раз называлі часткай «рускага свету», - распавялі арганізатары акцыі.