Аляксей Навальны: Патрэбныя санкцыі супраць тысячы расейцаў з «партыі вайны»

• 18.03.2015, 14:21

Гэта прывядзе да павелічэння кошту іх супрацоўніцтва з Пуцінам.

Расейскі апазіцыянер Аляксей Навальны мяркуе, што пастаўкі Штатамі зброі Украіне «будуць памылкай». Пра гэта ён сказаў у інтэрв'ю газеце The Washington Post, піша gordonua.com.

«Я не думаю, што пастаўкі смяротнай зброі змогуць кардынальна змяніць сітуацыю. Справа ў тым, што перамога ў вайне Украіны над Расеяй немагчымая. Пуцін жа атрымае новыя аргументы, што гэта амерыканцы за вайну ва Украіне, а не ўкраінцы», - сказаў Навальны.

З ягоных слоў, дэмакратычныя сілы наогул «недаацанілі, наколькі далёка Пуцін гатовы пайсці для захавання сваёй улады і папулярнасці».

Наўзамен паставак зброі Навальны раіць павялічваць санкцыі ў дачыненні да расейскай эліты.

«Увядзенне віз і фінансавых абмежаванняў для алігархаў ударыць па рэжыму Пуціна больш, чым дроны. Асабістыя санкцыі павінны быць уведзеныя не супраць 12 чалавек, а супраць партыі вайны, супраць тысячы чалавек», - сказаў Навальны.

На ягоную думку, «гэта прывядзе да павелічэння кошту іх супрацоўніцтва з Пуцінам. І гэта магло б дапамагчы раскалоць [расейскія] эліты».