Кіраўнік грузаперавозчыкаў Сяргей Штода арыштаваны на 15 дзён
- 3.02.2015, 17:40
Сяргей Штода, які абвясціў, што перавозчыкі выйдуць заўтра да Саўміну абараняць свае правы, атрымаў 15 дзён за тое, што «лаяўся матам».
Пра гэта ён паведаміў праз тэлефон сваёй жонцы сёння, 3 лютага, у 16.00, піша ucpb.org.
Раніцай 3 лютага ён адправіўся на сустрэчу з першым віцэ-прэм'ерам Васілём Мацюшэўскім. На сустрэчы планавалася абмеркаваць, як выйсці з сітуацыі, якая склалася - беларускія грузаперавозчыкі апынуліся на мяжы знішчэння. Улады абяцалі правесці амністыю штрафаў, якія ўтварыліся ў першыя тры месяцы працы сістэмы BelToll з прычыны тэхнічных збояў сістэмы і недастатковага інфармавання перавозчыкаў з нагоды новаўвядзення. Аднак пасля змены эканамічнай сітуацыі ўлады забралі сваё абяцанне назад.
Сяргей Штода пайшоў на прыём да першага віцэ-прэм'ера Мацюшэўскага, каб не даводзіць пытанне да заўтрашняй вулічнай акцыі, аднак сустрэча з другім чалавекам ва ўрадзе, як мы бачым, выявілася пасткай.
Сяргею не ўдалося развязаць пытанне ў кабінеце, значыць, у дзеянні застаецца яго аб'ява аб заўтрашняй акцыі:
«У нас ёсць яшчэ магчымасць, ёсць шанец нешта змяніць. Прыходзьце 4 лютага а 09:00 да Саўміну на Савецкую, 11, усе разам звернемся да Лукашэнкі. Усе канцы зводзяцца да яго. Звернемся і папросім разабрацца».