Радаслаў Сікорскі атрымаў ліст з пагрозамі

• 24.02.2015, 12:59

Спікер польскага Сейма і былы міністар замежных спраў Польшчы Радаслаў Сікорскі атрымаў ліст з пагрозамі.

Аб гэтым піша сайт Wpolityce.pl (пераклад - charter97.org).

Ліст быў адпраўлены ў офіс Сікорскага ў горадзе Быдгашч. Электронныя лісты з пагрозамі атрымалі таксама ягоныя супрацоўнікі.

На месцы знаходзіцца паліцыя. Піратэхнікі правялі ператрус офісаў Сікорскага ў Быдгашчы і Накле, нічога не знайшлі. Цяпер правяраюць суседнія будынкі.

У паведамленні, адпраўленым супрацоўнікам Сікорскага, гаворыцца, што спікера польскага Сейма заб'юць і ягоныя супрацоўнікі таксама павінны памерці.

Гэта першы выпадак, калі Сікорскі і ягоныя супрацоўнікі атрымліваюць непасрэдныя пагрозы.

- Вядома, здараліся нейкія непрыемныя паведамленні з рознымі абразамі, але ніколі раней ніхто не пісаў, што «мы павінны памерці», - сказала супрацоўніца офіса спікера Сейма.