Паўночная Карэя няўдала спрабавала запусціць балістычную ракету

• 28.11.2015, 21:26

Паўночная Карэя спрабавала запусціць балістычную ракету з падводнай лодкі ў суботу, 28 лістапада, але яе спробы ўвянчаліся няўдачай.

Ракета тыпу KN-11, выпушчаная з падводнай лодкі, не змагла прабіцца праз тоўшчу вады, пасля чаго на паверхні мора паказаліся абломкі, паведамляе «Інтэрфакс» са спасылкай на паўднёвакарэйскія СМІ.

Пры гэтым адзначаецца, гэта ўжо другі выпадак з траўня 2015 года, калі становіцца вядома пра выпрабаванні Паўночнай Карэяй балістычных ракет падводнага базавання. У траўні ў краіне паведамілі аб паспяховым выпрабаванні балістычнай ракеты, за пускам якой асабіста назіраў лідар КНДР Кім Чэн Ын.

У адказ на выпрабаванне міністэрства абароны Паўднёвай Карэі выказала занепакоенасць. Паводле яе ацэнак, ракета змагла падняцца на 100-150 м над паверхняй вады.

ЗША таксама раскрытыкавалі КНДР і заявілі, што гэта выпрабаванне з'яўляецца парушэннем рэзалюцый СБ ААН.