Міністр абароны Канады: Бамбаваннем «Ісламскую дзяржаву» не перамагчы
- 28.11.2015, 18:36
Без належнага навучання мясцовых сіл міжнародная кааліцыя ў барацьбе з ІД ніколі не дасягне сваёй мэты.
Такое меркаванне падчас прэс-канферэнцыі выказаў міністр абароны Канады Харжыт Сежан, паведамляе «Укрінформ».
«І я асабіста, і ўрад агулам адчувае патрэбнасць засяродзіцца на трэніроўцы. Калі мы не выканаем гэтага належным чынам, бомбы нічога не зменяць», - сказаў Сежан.
Разам з тым, ён падкрэсліў, што Канада застаецца надзейным партнёрам у барацьбе з ІДІЛам і адзначыў, што рэсурсы для ажыццяўлення авіяўдараў вылучаюць іншыя сябры міжнароднай кааліцыі. «Нягледзячы на складанасць і трагічнасць гэтых падзей, пастанова грунтуецца на агульных намаганнях кааліцыі з прыцягненнем усіх наяўных інструментаў. Мы будзем супрацьстаяць ІДІЛу як частка каманды», - растлумачыў міністр абароны Канады.
Ён падкрэсліў неабходнасць пошуку спосабаў апярэджанне дзеянняў тэрарыстаў і датэрміновага выяўлення пагроз для барацьбы з імі «ў зародку».
Нагадаем, што прэм'ер-міністр Канады паабяцаў павялічыць колькасць наземных інструктараў для навучання мясцовых сіл, якія супрацьстаяць ІДІЛу. Цяпер у Іраку служаць 69 канадскіх трэнераў.