Менскія прадпрымальнікі згортваюць бізнэс
- 26.11.2015, 7:39
Прадпрымальнікі пагражаюць спыніць дзейнасць з 1 студзеня.
Прычына - усё той жа тэхрэгламент Мытнага саюза «Аб бяспецы прадукцыі лёгкай прамысловасці», дакладней, забарона з новага года гандляваць рэшткамі тавараў без суправаджальных дакументаў, піша БелаПАН.
Увечары 25 лістапада ІП, якія гандлююць на Чэрвеньскім рынку сталіцы адзеннем і абуткам, правялі сход, на якім заявілі: арэнду не працягваем, бізнэс, хутчэй за ўсё, згортваем.
Як паведаміў сябра Рады прадпрымальнікаў Чэрвеньскага рынку, актывіст РГА «Перспектыва» Васіль Бараноўскі, апавяшчэнне аб непадаўжэнні арэнды ў адрас адміністрацыі рынка ўжо накіравалі больш за 70 ІП.
«Але гэта пакуль, - дадае прадпрымальнік. - У адміністрацыі скончыліся бланкі, мы цяпер самі надрукавалі дадатковыя».
Прадпрымальнікі напісалі заявы загадзя, бо павінны паведаміць аб падаўжэнні ці непадаўжэнні арэнды не пазней чым за месяц да заканчэння яе тэрміна, а плаціць за час, калі, хутчэй за ўсё, ужо не будуць працаваць, яны не жадаюць.
«Людзі нашы працуюць у асноўным з Масквой, а там, у сутнасці, раздробны гандаль, афіцыйных дакументаў на тавар ніхто нікому не дае, а калі даюць - узнікаюць праблемы: прызначаецца сустрэчная праверка ў Расеі па лініі МПЗ, і прадаўцы, як правіла, адмаўляюцца ад сваіх жа дакументаў, таму што яны не маюць права прадаваць прадукцыю за мяжу раздробным гандлем», - адзначыў Бараноўскі.
Сябра Савета прадпрымальнікаў Чэрвеньскага рынку не выключае таго, што пасля Новага года секцыя легпрама на рынку цалкам апусцее.
«У шэрагу, дзе я гандлюю, з шаснаццаці чалавек толькі ў аднаго ёсць усе дакументы, поўны камплект з сертыфікатамі, усе астатнія не могуць іх атрымаць, таму што возяць адзенне і абутак маленькімі партыямі», - сказаў актывіст «Перспектывы».
На сустрэчу быў запрошаны старшыня Беларускага звязу прадпрымальнікаў Аляксандр Калінін, які выступаў тут, хутчэй, у адміністрацыйнай якасці.
Чэрвеньскі рынак на новым месцы, пасля таго, як стары аддалі інвестару, які дагэтуль нічога не пабудаваў на ім, быў уладкаваны сіламі Рэспубліканскай канфедэрацыі прадпрымальніцтва, Менскага сталічнага саюза прадпрымальнікаў і працадаўцаў і Беларускага саюз прадпрымальнікаў. Таму прадстаўнікі гэтых структур выступаюць свайго роду пасярэднікамі паміж арандатарамі і адміністрацыяй рынку.
І ўсё бы нічога, але акрамя ўласных сродкаў, бізнэс-саюзы выкарыстоўвалі пры будаўніцтве новага рынку пазыковыя - валютны крэдыт, суму якога сёння не ўспамінаюць, трэба будзе выплачваць яшчэ цягам пяці гадоў.
«Вы спынілі працу, ніхто не выйшаў, але ёсць яшчэ трэці бок - банк, - адзначыў Аляксандр Калінін. - На нас вісіць крэдыт, банк прыйшоў, забраў гэты аб'ект, і вы будзеце не са мной гутарыць, вы будзеце размаўляць з банкірамі».
Старшыня Беларускага саюза прадпрымальнікаў нагадаў, што будынкі на тэрыторыі рынку з'яўляюцца залогам па крэдыце і паведаміў, што ў выпадку «масавага зыходу» ІП шукаць адказ на пытанне, што рабіць далей, прыйдзецца «ў трохбаковым фармаце» - з запрашэннем прадстаўнікоў банка.
«Вы пойдзеце, хтосьці прыйдзе на вашыя месцы», - сказаў было Калінін, тым самым справакаваўшы пытанні, пра тое, як можна прымусіць улады зноў адтэрмінаваць уваходжанне ў сілу тэхрэгламенту па лёгкай прамысловасці.
Нагадаем, згодна з указам ад 16 траўня 2014 года № 222 «Аб рэгуляванні прадпрымальніцкай дзейнасці і рэалізацыі тавараў індывідуальнымі прадпрымальнікамі і іншымі фізічнымі асобамі», 1 сакавіка 2015 года скончыўся тэрмін, калі ІП маглі рэалізаваць апісаныя рэшткі прадукцыі легпрама, увезеныя з краін Мытнага саюза без дакументаў , якія пацвярджаюць іх набыццё і паступленне, а таксама якасць і бяспеку.
Пасля сустрэчы Аляксандра Лукашэнкі з прадпрымальнікамі гандлёвага цэнтра «Экспабел» 17 сакавіка тэрмін рэалізацыі тавараў без дакументаў працягнулі да 1 студзеня 2016 года, са слоў Лукашэнкі, апошні раз.
«Вы ўсе бачылі па тэлевізары сустрэчу на «Экспабеле». Лукашэнка прыняў публічную пастанову на карысць буйнога бізнэсу, гандлёвых сетак», - адзначыў старшыня Беларускага саюза прадпрымальнікаў, удакладніўшы, што не верыць у такую сілу, якая прымусіла б яго ў трэці раз адкласці пастанову.
Тым не менш, Калінін паабяцаў, што падыме пытанне аб праверках прадпрымальнікаў, якія пачасціліся, і канфіскацыі тавараў без дакументаў 2 лістапада на пасяджэнні Савета развіцця прадпрымальніцтва пры прэзідэнце і 4 лістапада на сустрэчы Грамадска-кансультацыйнага савета пры Міністэрстве эканомікі.
«Наша лінія абароны пастаўленая на тым, што на тэрыторыі Беларусі вы выконваеце заканадаўства, - заявіў лідар бізнэс-саюза. - Мы бачым праблему: у шэрагу рэгіёнаў пайшлі прадузятыя праверкі. І нас турбуе, што не дзейнічае становішча дырэктывы №4 у тым плане, што калі вы купілі, задэкларавалі тавар і далей гандлюеце тут, то вы дзейнічаеце добрасумленна».
Аляксандр Калінін удакладніў, што, на ягоную думку, у выпадках з канфіскацыяй тавараў часта парушаецца прынцып абароны добрасумленнага набытчыка, гарантаваны ў тым ліку і дырэктывай. Старшыня Беларускага саюза прадпрымальнікаў прапанаваў у сувязі з гэтым звярнуцца па трактоўку нормаў заканадаўства ў Вярхоўны суд, а затым, можа быць, і ў адміністрацыю Лукашэнкі.
Але тых, хто сабраўся гэтыя дэталі не вельмі хвалявалі. ІП маюць надзею, што пасля Новага года нейкім цудам можна будзе падоўжыць пераходны перыяд тэхрэгламенту, нягледзячы на нядаўнюю заяву міністра эканомікі Уладзіміра Зіноўскага аб тым, што дыскусія пра сертыфікаты на тавары легпрама скончаная раз і назаўсёды.