Студэнтам БДУ давядзецца плаціць за пераздачу экзаменаў і залікаў
- 2.11.2015, 17:48
З 1 студзеня плаціць давядзецца за пераздачу экзаменаў, залікаў, а таксама за адпрацоўку практычных і лабараторных заняткаў.
Пра гэта, са словаў студэнтаў БДУ, распавядалі на нядаўнім савеце ўніверсітэта. Onliner.by высветліў, ці сапраўды ўніверсітэт збіраецца браць грошы за другія спробы падчас сесіі.
- Плата за паўторную здачу экзаменаў і залікаў ужо даўно ўведзеная ў большасці беларускіх ВНУ, - адзначылі ў прэс-службе Белдзяржуніверсітэта. - Наша ВНУ да апошняга часу заставалася адным з нямногіх універсітэтаў, дзе гэтая практыка не ўжывалася. Каб павысіць дысцыплінаванасць студэнтаў, такое становішча плануецца ўвесці.
Як растлумачылі ў прэс-службе, цяпер прапрацоўваюцца дэталі дакумента. Таму няма ні дакладных тэрмінаў, ні дакладных сум.
Магчыма, у БДУ будуць арыентавацца на іншыя ВНУ. Да прыкладу, у БДУІРы адпрацоўка аднаго лабараторнага занятку у асістэнта - 96 тысяч, у прафесара - 107. Пераздача экзамена каштуе 19,2 тысячы ў простага выкладчыка, 20,8 - у дацэнта і 22,8 тысячы - у прафесара. Пераздаць залік можна за 17,2 або 18,8 тысячы.
- У кожным выпадку гэтае новаўвядзенне не закранае пераважную большасць студэнтаў, якія адказна ставяцца да вучобы і не дапускаюць акадэмічнай запазычанасці, - мяркуюць у прэс-службе. - БДУ ўпэўнены, што ўнясенне платы за паўторную здачу залікаў і экзаменаў стане дадатковым стымулам для тых, хто не надае належнай увагі вучобе.
Ва ўніверсітэце супакоілі: зімовую сесію студэнты будуць здаваць без змен.