Расея спрабавала «адключыцца» ад інтэрнэту

• 14.10.2015, 21:30

Міністэрства камунальнай сувязі і Раскамнадгляд правялі эксперымент у мадэляванні адключэння Расеі ад інтэрнэту.

Як паведаміў віцэ-прэзідэнт Медыя-камунікацыйнага звязу і гендырэктар правайдэра «Эр-Тэлекам» Андрэй Семерыкоў, эксперымент праводзіўся вясной 2015 года і скончыўся няўдачай, піша С-news.

Са слоў Семерыкова, падчас эксперыменту Раскамнадгляд пасылаў на дыспетчарскія пункты буйных аператараў сувязі ўказанні блакаваць трафік з тых ці іншых замежных магістральных каналаў.

Як высветлілася, цалкам перакрыць сувязь Расеі з навакольным светам не атрымалася: трафік усё роўна сыходзіў за мяжу, прычым маршруты прытрымлівання трафіку так і засталіся невядомымі.

Семерыкоў мяркуе, што прычынай гэтай сітуацыі з'яўляецца вялікая колькасць невялікіх («шэрых») інтэрнэт-правайдэраў, дзейнасць якіх слаба кантралюецца дзяржавай.

«У гэтых правайдэраў адсутнічаюць сістэмы DPI, што не дазваляе дзяржаве кіраваць іх трафікам. Да таго ж правайдэры часцяком выкарыстоўваюць спадарожнікавыя каналы, праз што ўтвараюцца некантралюемыя ўладамі стыкі паміж расейскім і замежным інтэрнэтам», - адзначыў ён.

У верасні 2014 Савет бяспекі Расеі планаваў разгледзець магчымасць адключэння інтэрнэту ў РФ у надзвычайных абставінах.