Жыхар Жабінкаўскага раёна прадаваў замест iPhone 6 драты
- 17.01.2015, 13:23
Жыхар Жабінкаўскага раёна Берасцейскай вобласці размяшчаў аб'явы аб продажы дарагіх тэлефонаў, а дасылаў пакупнікам драты.
Пра гэта паведамляе Следчы камітэт Беларусі.
"24-гадовы прадпрымальны жыхар Жабінкаўскага раёна Берасцейскай вобласці ў сетцы Інтэрнэт размясціў аб'яву аб продажы мабільных тэлефонаў iPhone 6. У наяўнасці ў мужчыны гаджэтаў не мелася, таму пакупніку з Магілёва замест "айфона" па пошце хлопец у скрынцы адправіў металічныя драты", - праінфармавалі ў СК.
Ашуканы атрымальнік пасылкі, які заплаціў за яе Br7,7 млн, звярнуўся з заявай у праваахоўныя органы. Высветлілася, што аналагічным чынам падманутымі аказаліся жыхары і іншых гарадоў Беларусі.
Так, у Маладзечна, пакупнік у аддзяленні паштовай сувязі перавёў прадаўцу абумоўленую раней суму і заплаціў двухадсоткавы паштовы збор, пасля чаго яму выдалі пасылку. Выявіўшы ў ёй драты, атрымальнік своечасова прыняў меры, у выніку чаго грашовы перавод быў адразу ж замарожаны. Паводле гэтага факту Маладзечанскім раённым аддзелам распачатая крымінальная справа ў частцы 1 артыкула 14, часткі 1 артыкула 209 (замах на махлярства) Крымінальнага кодэкса Беларусі.
"Прадавец затрыманы супрацоўнікамі органаў унутраных спраў у Берасці. У дачыненні да яго Берасцейскім міжраённым аддзелам Следчага камітэта за падман жыхара Магілёва распачатая яшчэ адна крымінальная справа. У сапраўдны час з падазраваным працуюць следчыя, у дачыненні да мужчыны прымененая мера стрымання ў выглядзе ўтрымання пад вартай", - адзначылі ў Следчым камітэце.
Фота: Reuters