Генпракуратура распачала крымінальныя справы супраць шэрагу чыноўнікаў

• 16.01.2015, 17:29

Чыноўнікаў абвінавачваюць у буйных крадзяжах.

Пракуратурай Менскай вобласці распачатая крымінальная справа ў дачыненні да дырэктара сельскагаспадарчага ўнітарнага прадпрыемства Бярэзінскага раёна, які падазраецца ва ўнясенні змен у штатны расклад прадпрыемства, у адпаведнасці з якімі ён атрымаў не прадугледжаныя кантрактам выплаты ў суме больш за 70 млн рублёў, піша «Штодзённік».

Пракуратурай Віцебскай вобласці распачатая крымінальная справа ў дачыненні да былога галоўнага бухгалтара ГУ «Шаркаўшчынскі раённы цэнтр гігіены і эпідэміялогіі», які падазраецца ў крадзяжы бюджэтных сродкаў на суму больш 149 млн рублёў.

Пракуратурай Глыбоцкага раёна распачатая крымінальная справа ў дачыненні да начальніка аднаго з аддзелаў райвыканкама. Паводле яго ўказання, як падазраюць следчыя, у якасці вартаўніка быў аформлены яго сваяк, які фактычна свае абавязкі не выконваў. Заработная плата ў суме больш за 56 млн рублёў была атрыманая падазраваным, паведамілі ў прэс-службе Генпракуратуры.