Улады Венесуэлы забаранілі купляць прадукты часцей за два разы на тыдзень
- 15.01.2015, 14:29
На фоне дэфіцыту ў Венесуэле, які павялічваецца, улады абмежавалі наведванне дзяржаўных харчовых крам.
У краіне ўжо ўведзеныя карткі на базавыя тавары для маламаёмных слаёў насельніцтва, піша РБК.
Венесуэльскім паліцыянтам, якія ахоўваюць парадак каля дзяржаўных харчовых крам, у якіх тавары прадаюцца па фіксаваных нізкіх коштах, загадалі правяраць дакументы ў пакупнікоў. Наведванне гэтых крам для грамадзян краіны абмежаванае двума разамі ў тыдзень, піша The Times.
Супрацоўнікі іміграцыйнай службы таксама нясуць дзяжурства ля гандлёвых кропак, каб прадухіліць куплю ежы замежнікамі, якія адпраўляюць кантрабандай танныя прадукты ў суседнія краіны. Паводле звестак выдання, дэфіцыт тавараў намеціўся нават на чорным рынку. Праваахоўныя органы на пастаяннай аснове нясуць службу ля крам, у якіх прадаюцца тавары для маламаёмных, праз засцярогу беспарадкаў.
Жыхарам краіны штодня даводзіцца праводзіць у чэргах па некалькі гадзін, каб купіць такія тавары, як малако або муку. Ажыятаж пры продажы дэфіцыту вымусіў мясцовыя ўлады звяртацца да рознага роду абмежаванняў. Напрыклад, як паведамляе РІА «Новости», у штаце Яракуй забаранілі стаяць у чэргах па начах, паколькі яго губернатар Хуліа Леон Эрэдыя палічыў, што такую актыўнасць праяўляюць у асноўным спекулянты. Ён напісаў у сваім твітэры: «Учора, вывучыўшы шматлікія скаргі насельніцтва, я распарадзіўся забараніць людзям праводзіць ночы каля гандлёвых кропак».
Кіраўнік нацыянальнай службы харчовай бяспекі Карлас Асорыё сцвярджае, што доўгія чэргі сведчаць аб прадуктовым багацці. Выступаючы па дзяржаўным тэлебачанні, ён заявіў: «Калі б у Венесуэле не было ежы, не было б і чэргаў, якія мы тут бачым. У нас не збіралася б столькі людзей у гэтых установах. Гэта найлепшая дэманстрацыя таго, што ў нас ёсць». Міністр харчавання Іван Хасэ Бельё Рохас падвергнуўся кпінам пасля таго, як заявіў, што яму таксама прыйшлося адстаяць чаргу, каб патрапіць на футбольны матч, а потым - каб купіць паесці на стадыёне.
Венесуэла вымушаная была ўвесці картачную сістэму для пакупак у дзяржаўных крамах у сувязі з ростам коштаў, павелічэннем дэфіцыту тавараў і агульным эканамічным крызісам, выкліканым падзеннем коштаў нафты.