Пратэстоўцы Ганконга абыходзяць блакаванне інтэрнэту

• 29.09.2014, 10:07

На фоне акцый пратэсту жыхары Ганконга пераходзяць на месенджар FireChat.

Аб гэтым піша South China Morning Post са спасылкай на распрацоўніка прыкладання, кампанію Open Garden. Як удакладняе выданне, гэтая чат-праграма здольная працаваць пры адсутнасці падлучэння да інтэрнэту і па-за зонай дзеяння сотавай сувязі.

Паводле інфармацыі Open Garden, за апошнія дні блізу 100 тыс карыстальнікаў з Ганконга спампавалі FireChat для смартфонаў. Як распавёў заснавальнік і CEO кампаніі Міша Беналіэл, невялікі рост колькасці падпісчыкаў назіраўся ў суботу, а ў нядзелю гэты паказчык рэзка павялічыўся.

Кіраўнік Open Garden удакладніў, што за дзень з раніцы нядзелі да раніцы панядзелка паводле Ганконскага часу дадаткам адначасова карысталіся да 33 тыс чалавек. Акрамя таго, Беналіэл заявіў, што аўстралійскія, канадскія, амерыканскія і брытанскія групы, якія падтрымліваюць пратэстуючых Ганконга, таксама перайшлі на FireChat.

Выданне, у сваю чаргу, адзначае, што ў нядзелю арганізатары акцый пратэсту заклікалі ўдзельнікаў дэманстрацый спампоўваць FireChat праз чуткі аб магчымым адключэнні сотавай сувязі. Раней паведамлялася, што Instagram заблакаваны ў кантынентальнай частцы Кітая на фоне пратэстаў.

Таксама паведамлялася, што ў выходныя абвастрылася сітуацыя ў Ганконгу, дзе ўжо некалькі тыдняў доўжацца студэнцкія дэманстрацыі супраць кітайскіх рэформаў выбарчага заканадаўства. Дзесяткі тысяч маладых людзей выйшлі на цэнтральныя плошчы мегаполіса, абвінавачваючы Пекін у дэмантажы палітыкі «адна краіна - дзве сістэмы», на ўмовах якой Ганконг уз'яднаўся з мацерыковым Кітаем.

Фота: Reuters