Расейскі святар адлучыў ад прычасця падбухторшчыкаў вайны ва Украіне
- 1.09.2014, 15:31
Святар са Старой Русы Грыгорый на 11 гадоў адлучыў ад прычасця ўсіх падбухторшчыкаў «братазабойчай» вайны ва Украіне.
Пра гэта паведамляе «Новая газета».
Вось якія словы прагучалі з амбона храма Святога велікамучаніка Георгія ў горадзе Старая Руса на пропаведзі 31 жніўня 2014 года:
«Я, недастойны святар Грыгорый, уладай мне дадзенай на падставе правілаў святога Васіля Вялікага, адлучаю ад святога прычасця тэрмінам на 20 гадоў усіх, хто па сваёй волі ўзяў у рукі зброю для ўдзелу ў братазабойчай вайне ва Украіне. Таксама на падставе правілаў святога Васіля Вялікага тэрмінам на 11 гадоў адлучаюцца ад святога прычасця ўсе тыя, хто сваёй дзейнасцю і сваімі словамі вусна або пісьмова падбухторваў да ўдзелу ў братазабойчай вайне. Амэн».
Айцец Грыгорый нядаўна вярнуўся з Краматорска і прасіў агучыць гэты тэкст.
Горад Старая Руса знаходзіцца ў Наўгародскай вобласці. Насельніцтва Старой Русы, паводле звестак даведнікаў, у 2011 годзе склала крыху больш за 30 тысяч чалавек.