У Еўрапарламенце прапануюць выключыць рубель з фінансавага абарачэння

• 21.08.2014, 11:15

Расейскі рубель прапануюць выключыць з міжнароднага фінансавага абароту.

Намеснік старшыні Еўрапарламента Рышард Чарнецкі заявіў, што Еўропе трэба падрыхтаваць прафілактычныя санкцыі супраць ключавых сегментаў расейскай эканомікі і выключыць рубель з міжнароднага фінансавага абарачэння, паведамляе РІА Новости.

"Расейскі рубель павінен перастаць быць канверсоўнай валютай, рубель трэба выключыць з міжнароднага фінансавага абарачэння", - заявіў Чарнецкі, выступаючы ў Сэйме Польшчы ў сераду.

Паводле ягоных слоў, "у дачыненні да Расеі варта падрыхтаваць загадзя прафілактычныя санкцыі і працаваць на апярэджанне".

Чарнецкі з'яўляецца віцэ-спікерам Еўрапарламента новага склікання. Ён быў абраны еўрадэпутатам ад Польшчы праз партыйны спіс кансерватыўнай партыі "Права і справядлівасць".