Міністр эканамічнага развіцця Украіны падаў у адстаўку

• 21.08.2014, 10:46

Міністр эканамічнага развіцця і гандлю Украіны Павел Шарамета падаў у адстаўку і ягоная заява ўжо перададзеная ў Вярхоўную Раду.

Пра гэта паведамілі УНІАН у прэс-службе Кабінета міністраў Украіны.

«Заява (аб адстаўцы) сапраўды пададзеная ў Раду», - паведамілі ў прэс-службе. У той жа час у прэс-службе адмовіліся паведаміць ці пракаментаваць прычыны адстаўкі.

У прэс-службе Міністэрства эканамічнага развіцця і гандлю заявілі, што каментаваць адстаўку не будуць. Афіцыйную заяву зробіць сам міністр на брыфінгу, запланаваным у Кіеве а 13.15. Аднак на сваёй старонцы ў сацыяльнай старонцы ў «Фэйсбуку» міністр пацвердзіў намер сысці ў адстаўку і заявіў: "Так, замест таго, каб далей ваяваць з сістэмай, наважыў засяродзіцца на працы з заўтрашнімі людзьмі, якія створаць заўтрашнюю сістэму».

20 жніўня Кабмін прыняў пастанову аб стварэнні ва Украіне Інстытута гандлёвага прадстаўніка, задача якога - прасоўваць і абараняць інтарэсы ўкраінскіх таваравытворцаў, і прызначыў на гэтую пасаду Валерыя Пятніцкага, які займае пасаду ўрадавага ўпаўнаважанага ў пытаннях еўраінтэграцыі. Аднак такая пастанова была непрымальная для міністра Паўла Шараметы. Гэта, як мяркуецца, і стала меркаванай прычынай адстаўкі міністра.