Святочныя лінейкі ў менскіх школах пройдуць 30 жніўня

• 18.08.2014, 12:32

Святочныя лінейкі, прысвечаныя пачатку новага навучальнага года, пройдуць у менскіх школах 30 жніўня.

Пра гэта паведаміў старшыня камітэта адукацыі Менгарвыканкама Міхаіл Мірончык, піша БелТА.

Цяпер заканчваецца прыём гатоўнасці сталічных устаноў адукацыі. Пашпарты гатоўнасці атрымалі 238 з 240 школ. Як растлумачыў Міхаіл Мірончык, яшчэ дзве школы атрымаюць пашпарты гатоўнасці да 20 жніўня.

З 1 верасня да заняткаў ва ўстановах агульнай сярэдняй адукацыі ў новым навучальным годзе пачнуць 165 тысяч. Навучэнцаў, што на 1,7 тысячу больш чым у мінулым годзе. У сталічных школах адкрыецца 807 першых класаў, колькасць якіх у параўнанні з мінулым годам павялічыцца на 22. За парты сядуць больш за 19 тысяч першаклашак, што на 3 тысячы больш, чым у 2013-м. "Паводле традыцыі 1 верасня першы ўрок у сталічных школах будзе называцца "Я - мянчук". На гэтых ўроках будуць прысутнічаць ветэраны ВАВ, прадстаўнікі Менгарвыканкама, міністэрстваў і ўстаноў", - адзначыў Міхаіл Мірончык.

Гаворачы аб укамплектаванасці кадрамі, Міхаіл Мірончык адзначыў, што цяпер у Менску не стае настаўнікаў пачатковых класаў і выхавальнікаў дашкольных устаноў. "Пры гэтым нельга сказаць, што ёсць сур'ёзная кадравая праблема. Установы адукацыі стала папаўняюцца новымі кадрамі, толькі ў новым навучальным годзе ў сістэму адукацыі Менска прыйдуць блізу 700 маладых спецыялістаў", - растлумачыў ён.