Столь у кватэры абрынулася на сям'ю ў Хойніках

• 18.08.2014, 10:18

Частковае абрынанне перакрыцця столі адбылося ўчора вечарам у кватэры двухпавярховага жылога дома ў Хойніках.

Пацярпелых няма, паведамілі charter97.org у прэс-службе Гомельскай абласной управы МНС.

Пасля прыбыцця да месца выкліку ратавальнікі выявілі, што абрынанне адбылося ў двухпакаёвай кватэры, размешчанай на другім паверсе цаглянага 8-кватэрнага дома. Фрагмент столі плошчай 9 кв м абрынуўся ў зале. На шчасце, у гэты момант сямейнікі - двое дарослых і двое дзяцей - знаходзіліся ў іншым пакоі. Ніхто не пацярпеў.

На гэты момант усталёўваецца прычына надзвычайнага здарэння. Вядома, што дом пабудаваны ў 1955 годзе і знаходзіцца на балансе Хойніцкага прадпрыемства жыллёва-камунальнай гаспадаркі. Гаспадары кватэры, у якой адбылося абрынанне, часова пасяліліся ў сваякоў, а іх суседзям з першага паверха выдадзенае жыллё з манеўранага фонду ЖКГ.

Фота: МНС