Дзевяцікласніца перамагла на міжнароднай алімпіядзе, напісаўшы пра беларускую мову

• 8.07.2014, 20:53

На міжнароднай алімпіядзе рускай мовы перамагла баранавіцкая дзевяцікласніца.

Яна напісала сачыненне пра беларускую мову і паступіла ў расейскую ВНУ за два гады да паступлення, паведамляе мясцовае выданне Intex-Press.by.

Алімпіяда рускай мовы для краін СНД, Балтыі, Грузіі, а таксама непрызнаных Абхазіі і Паўднёвай Асеціі прайшла ў Маскве з 23 па 27 чэрвеня. Беларускую каманду прадставілі 10 школьнікаў, сярод якіх была і выпускніца 9-га класа гімназіі №2 Баранавічаў Юлія Емельяновіч.

У трох этапах спаборніцтвы - сачыненне, вусная лінгвістычная і іспыт у расейскім краіназнаўстве - Юлія набрала найвышэйшы бал у сваёй камандзе і стала адной з пяці пераможцаў у намінацыі «абсалютны пераможца».

Дзяўчына абрала вольную тэму «Я хачу расказаць вам пра...» і напісала пра беларускую мову.

«Для мяне гэта блізкая тэма, я распавядала ў сачыненні пра фанетычныя асаблівасці, пра гісторыю мовы, рэформы, пра тое, што ў ёй ёсць два алфавіты, дзве арфаграфічныя сістэмы, а таксама пра сучасную папулярызацыю сярод моладзі і інтэлігенцыі», - распавяла Юлія.

Сёлета дзяўчына наведвала беларускамоўныя курсы «Мова наноў» у Баранавічах, пачала размаўляць на беларускай. Зрэшты, яна захапляецца і іншымі мовамі: рускай, ангельскай, нямецкай, польскай. Яна ўпэўненая, што мовы вельмі важныя.

За перамогу Юля атрымала магчымасць бясплатна вучыцца ў любым расейскім ВНУ. Яна кажа, што хутчэй за ўсё, скарыстаецца гэтым, аднак з'язджаць назаўжды з Беларусі не хоча.

«Плюс у тым, што Расея ўваходзіць у Балонскі працэс, і мой дыплом будзе каціравацца ва ўсім свеце. Пасля універсітэта я б хацела паехаць папрацаваць у Еўропу, а потым вярнуцца ў Беларусь, увасабляць і развіваць культурныя ідэі, напрыклад, палярызацыю беларускай мовы як сродку міжславянскіх камунікацый», - кажа Юлія.

Фота: Дзмітрый Макарэвічч