Відэа з Будслава: малітва вернікаў з усяго свету
- 5.07.2014, 18:29
У Будславе тысячы вернікаў прыйшлі пакланіцца іконе Божай Маці.
4-5 ліпеня ў Будславе (Мядзельскі раён Менскай вобласці) праходзяць урачыстасці ў гонар Будслаўскай іконы Божай Маці, паведамляе БелаПАН.
У невялікай вёсцы ля касцёла Ушэсця Маці Божай сабраліся тысячы паломнікаў з усёй Беларусі і з-за мяжы. Яны ўзялі ўдзел у набажэнствах, галоўнае з якіх адбылося ў ноч на 5 ліпеня. Яго правёў апостальскі нунцый у Беларусі арцыбіскуп Клаўдыё Гуджэроці.
Літургіі папярэднічала працэсія вернікаў з копіяй абраза Маці Божай Будслаўскай, свечкамі і лампадамі. Ва ўрачыстасцях узялі ўдзел мітрапаліт Менска-Магілёўскі арцыбіскуп Тадэвуш Кандрусевіч.
Будслаўскі абраз Божай Маці - адзін з самых паважаных у каталіцкай царкве і славіцца шматлікімі цудамі. Пачынаючы з 1992 года тысячы вернікаў прыходзяць і прыязджаюць пакланіцца святыні. 2 ліпеня 1996 года Маці Божая Будслаўская была абвешчаная нябеснай заступніцай Менска-Магілёўскай архідыяцэзіі.