Над Луганскам праляцелі расейскія самалёты
- 29.07.2014, 17:20
Самалёты ВПС Расеі залятаюць на тэрыторыю Украіны да 50 кіламетраў ад мяжы.
Пра гэта на сваёй старонцы ў сацыяльнай сетцы «Фэйсбук» напісаў прэс-афіцэр антытэрарыстычнай аперацыі Уладзіслаў Селязнёў.
«Так, сёння, 29.07.14 у перыяд з 08.33 да 08.38 сіламі АТА зафіксаванае парушэнне дзяржаўнай мяжы Украіны з боку РФ лятальнымі апаратамі. Гэта ўжо не першы такі выпадак», - напісаў Селязнёў.
З ягоных слоў, напярэдадні таксама зафіксавана некалькі фактаў незаконнага парушэння мяжы Украіны лятальнымі апаратамі з боку РФ.
«Часам гэтыя самалёты сыходзілі ўглыб тэрыторыі Украіны на адлегласць да 50 кіламетраў, перамяшчаліся ў тым ліку і над горадам Луганскам», - паведаміў спікер АТА.
Пры гэтым Селязнёў нагадаў, што сілавікі дакладна выконваюць загад Вярхоўнага Галоўнакамандуючага ВС Украіны ў забароне вядзення агню артылерыі і авіяцыі ў жылых раёнах і месцах, дзе пражывае мірнае насельніцтва рэгіёну.