У Менску пройдзе парад пажарных

• 24.07.2014, 16:05

26 ліпеня ў сталіцы адбудзецца парад у гонар Дня пажарнай службы.

Пра гэта сайту charter97.org паведамілі ў прэс-службе МНС.

Дзень пажарнай службы адзначаецца 25 ліпеня, а святочны парад пройдзе ў суботу 26 ліпеня.

«Урачыстыя мерапрыемствы адбудуцца ў Цэнтральным парку імя Горкага. А 11:00 ад будынка цырка да плошчы Перамогі пройдзе парад падраздзяленняў па надзвычайных сітуацыях», - распавялі ў міністэрстве.

Пасля параду ўсе збяруцца ў парку, дзе пройдуць паказальныя выступленні ўзвода ганаровай варты Камандна-інжынернага інстытута МНС.

На Свіслачы будзе арганізаваны парад плаўсродкаў МНС, у парку імя Горкага адбудзецца канцэрт з дэманстрацыяй спецтэхнікі.

Святочныя мерапрыемствы запланаваныя і ў абласных цэнтрах і іншых гарадах. Так, 25 ліпеня ў Берасці на вуліцы Гогаля адкрыюць скульптурную кампазіцыю, якая прысвечана выратавальнікам-пажарным, а ў Барысаве ў гарадскім палацы культуры прыме прысягу чарговае папаўненне МНС.