Украіна ўвяла спецыяльныя мыты на беларускія прадукты

• 16.07.2014, 11:28

Украіна ўвяла спецыяльныя мыты на пастаўку беларускіх малочных прадуктаў, кандытарскіх вырабаў ды піва.

Гэта зроблена ў адказ на дыскрымінацыйныя непрыязныя дзеянні з боку Рэспублікі Беларусь у дачыненні да ўкраінскіх вытворцаў напояў і прадуктаў харчавання, піша УНІАН.

Адпаведную пастанову прыняла Міжміністэрская камісія міжнароднага гандлю.

У прыватнасці, на малако, вяршкі, ёгурты, кефір, сметанковае масла, а таксама на кандытарскія вырабы з цукру, шакалад і мучныя прысмакі, што імпартуюцца з Беларусі, уводзіцца мыта ў суме 55,29% ад мытнага кошту гэтай прадукцыі.

Для беларускага соладавага піва Украіна ўводзіць мыты ў суме 60,05% ад мытнага кошту.

Спецыяльныя мыты будуць ужывацца да названых тавараў да 31 снежня 2016 года.

Пастанова камісіі ўваходзіць у дзеянне праз 10 дзён з моманту яе апублікавання.

Нагадаем, з 1 траўня Беларусь увяла ліцэнзаванне імпарту піва з-за межаў Мытнага саюза. Украінскія вытворцы піва назвалі гэта дыскрымінацыйнымі мерамі і паведамілі, што ў Беларусі ад іх запатрабавалі павысіць раздробны кошт сваёй прадукцыі больш чым удвая, што аўтаматычна робіць украінскае піва неканкурэнтаздольным на беларускім рынку. Аналагічныя захады Беларусь ужыла і да ўкраінскіх кандытарскіх вырабаў.

Фота: krmagazine.ru