Масква абвінаваціла Украіну ў парушэнні мяжы

• 12.07.2014, 20:07

Масква абвінаваціла Украіну ў абстрэле памежнага патруля з расейскай тэрыторыі.

Пра гэта гаворыцца ў паведамленні МЗС Расеі.

«12 ліпеня а 3 гадзіне ночы ў Куйбышаўскім раёне Растоўскай вобласці з аўтаматычнай стралковай зброі быў абстраляны расейскі памежны патруль, які выконваў задачы аховы дзяржаўнай мяжы Расейскай Федэрацыі на службовым аўтамабілі. У выніку абстрэлу быў пашкоджаны корпус аўтамашыны, у якім выяўлена восем кулявых адтулін. Толькі на шчаслівую выпадковасць ніхто з расейскіх памежнікаў не пацярпеў», - гаворыцца ў заяве.

Са слоў МЗС РФ, «маюцца пераканаўчыя довады таго, што абстрэл памежнікаў вёўся як з украінскай тэрыторыі, так і з загадзя падрыхтаванай пазіцыі на тэрыторыі Расейскай Федэрацыі пасля пранікнення туды тых, хто нападаў з тэрыторыі Украіны».

«Расейскі бок заяўляе ўкраінскаму боку чарговы рашучы пратэст і патрабуе спыніць абстрэлы расейскай тэрыторыі і парушэнне мяжы Расейскай Федэрацыі», - гаворыцца ў заяве.

Нагадаем, раней Расея ўжо вінаваціла Украіну ў абстрэле сваёй тэрыторыі. Довадаў дачынення да гэтага ўкраінскіх сілавікоў Масква не дала. Не выключана, што абвінавачванні ў «абстрэлах» тэрыторыі РФ могуць быць выкарыстаны Крамлём для апраўдання ўварвання ва Украіну.