Як Euronews падыгрывае Крамлю
- 4.06.2014, 9:35
Знайдзіце 10 адрозненняў. Ну, добра, не 10, хоць бы парачку.
"Украінскія сілавікі пачалі наступ на асноўныя пазіцыі байцоў народнай самаабароны", "Апалчэнне Славянска сцвярджае, што збіла Су-25", "Пад Славянскам апалчэнцы падбілі чатыры ўкраінскіх БТР", - паведамляюць Вести 24 у сваіх навінавых сюжэтах на тэлеканале "Россия 24", асабліва не задаючыся пытаннямі, адкуль у "народнай самаабароны" ці "апалчэння" ўзялося ўзбраенне, здольнае збіць дагукавы штурмавік, а таксама знішчыць верталёт, некалькі танкаў і БТР. Не паложана ім па рэдакцыйнай палітыцы забіваць галовы такімі пытаннямі, піша "Обозреватель".
А вось урыўкі з навінавых сюжэтаў іншага канала - Euronews.
"Луганскі памежатрад атакаваны апалчэнцамі ЛНР", "Перамір'е, абвешчанае раней у Луганску, перарвана, і бой па-прарасейску настроеных апалчэнцаў з памежнікамі аднавіўся зноў", - распавядае сваёй рускамоўнай аўдыторыі еўрапейскі канал, галоўнай задачай якога, у адпаведнасці з рэдакцыйным статутам, з'яўляецца асвятленне навін у "кантэксце пабудовы еўрапейскага адзінства".
Euronews гэтак жа, як і расейскія журналісты, не заўважае добра ўзброеных, часам нават - пераноснымі зенітна-ракетнымі комплексамі, наёмных вайскоўцаў - нярэдка з расейскімі пашпартамі, залічылі усіх пад адзін грабянец у шэрагі так званага народнага апалчэння.
Але на гэтым нюансы рэдакцыйнай палітыкі Euronews не сканчаюцца. Украінская, расейская і англійская рэдакцыі канала часам па-свойму трактуюць падзеі, якія адбываюцца ва Украіне, адпаведна па-рознаму называючы "зялёных чалавечкаў", якія з'явіліся на тэрыторыі Данецкай і Луганскай абласцей.
Ніжэй - навіна пра адну і тую ж падзею на трох мовах. Ва ўкраінскай версіі Euronews тэрарыстаў называюць "баевікамі" і "ўзброенымі людзьмі, якія падтрымліваюць сепаратызм". У англамоўнай - "сепаратыстамі" і "прарасейскімі нападнікамі". А вось у рускім варыянце гэтай жа навіны згадка пра сепаратызм, які, дарэчы, ва Украіне крымінальна наказваецца, у звязку з прадстаўнікамі самаабвешчаных Данецкай і Луганскай рэспублік знікае. Узброеныя да зубоў тэрарысты ў журналісцкім тэксце называюцца "апалчэнцамі", "паўстанцамі", максімум - "байцамі". Хоць у іншых матэрыялах рускамоўнай версіі Euronews іх не раз характарызуюць як "сепаратыстаў".
Прыбяры назву канала - і рыторыку еўрапейскага вяшчальніка не адрозніш ад пракрамлёўскіх ідэалагемаў, якія распаўсюджваюцца кісялёвымі, салаўёвымі і падобнымі. Хіба што больш культурная тая, сціплей неяк.
Дзіўнае адзінства пазіцый становіцца менш дзіўным пасля таго, як паглядзіш пералік найбуйнейшых акцыянераў Euronews. Усерасейская дзяржаўная тэлерадыёвяшчальная кампанія (ВГТРК) з 2004 года валодае амаль 17% акцый Euronews, з'яўляючыся трэцім найбуйнейшым уласнікам еўрапейскага вяшчальніка, пасля Францыі і Італіі.
Названая ВГТРК уключае ў сябе даволі вядомыя тэлеканалы "Россия 24", "Россия-1", "РТР-планета". Умелымі і выразнымі ручкамі Дзмітрый Кісялёў там дырыжуе хорам антыўкраінскіх галасоў.
Валід Арфуш, кіраўнік Euronews у СНД, смяецца ў адказ на меркаванне, што кіраваны ім канал падыгрывае Расеі.
"Свабодная журналістыка, што - азначае падтрымку крамлёўскай прапаганды? - пытаннем на пытанне адказвае ён. - У рэдакцыі Euronews заўсёды збіраюцца нарады, на якіх вызначаецца, каго і як зваць. Любы СМІ мае права называць тую ці іншую падзею так, як лічыць гэта патрэбным. Міжнародны тэлеканал не можа быць суддзёй у тым, што адбываецца. Мы толькі паказваем, што адбываецца. Я з вамі цалкам не згодны. Euronews робіць сваю працу так, як лічыць патрэбным - у нас абсалютна свабодная, незалежная журналісцкая праца, якая не залежная ні ад якога расейскага ці ўкраінскага ціску".
Любое ўмяшанне расейскіх акцыянераў у выбар танальнасці пры асвятленні падзей Валід Арфуш адкідвае. Сцвярджае: яму ніхто з Расеі адносна сюжэтаў не тэлефануе.
Хоць не ў апошнюю чаргу для таго, каб мець магчымасць прыўнесці сваё бачанне ў асвятленне сусветных падзей, ВГТРК так настойліва імкнулася ўвайсці ў тройку найбольш уплывовых акцыянераў еўравяшчальніка.
"Вельмі важна тое, што цяпер наш пункт гледжання на тыя ці іншыя міжнародныя падзеі, безумоўна, будзе ўлічвацца", - неасцярожна сказаў пасля завяршэння здзелкі ў 2004 годзе намеснік старшыні ВГТРК Андрэй Быстрыцкі.
Праз некалькі гадоў пасля набыцця Расеяй права голасу на Euronews у інтэрв'ю газеце "Коммерсант" прэзідэнт тэлеканала Філіп Кайла распавёў, як Масква спрабавала ўплываць на журналістаў, якія працуюць у офісе канала ў Леоне: "Я ведаю, што журналісты нашай рускай службы атрымліваюць званкі з Масквы, і ім выказвалася некаторая незадаволенасць тымі ці іншымі сюжэтамі. А я асабіста, напрыклад, атрымаў ліст з расейскага МЗС з нагоды таго, што Euronews не так асвятляў пазіцыю Расеі ў Косава".