Дыверсант рыхтаваў выбух на вайсковым аэрадроме пад Мікалаевым

• 26.06.2014, 18:49

Мужчына атрымаў заданне пашкодзіць самалёты УСУ ад куратараў з Крыма.

Служба бяспекі Украіны сумесна з украінскімі вайскоўцамі затрымала ўкраінца, які планаваў учыніць дыверсіі на вайсковым аэрадроме Мікалаеўскай вобласці.

41-гадовага мясцовага жыхара затрымалі 19 чэрвеня. Мужчына назіраў за вайсковым аэрадромам, пры затрыманні ў яго канфіскавалі бінокль, рацыю, наладжаную на радыёхвалі вайсковай часткі, два выбуховыя прыстасаванні, гранату РГД-5 і расейскія рублі. Пра гэта гаворыцца ў паведамленні СБУ.

«Са слоў зламысніка, у пачатку чэрвеня г.г. ён атрымаў заданне ад куратараў з тэрыторыі АР Крым пашкодзіць вайсковыя самалёты УСУ на аэрадроме. Для гэтага дыверсант вывучаў графік палётаў, месцы магчымага пранікнення на тэрыторыю аэрадрома і сістэму яго аховы», - распавялі ў СБУ.