Археолагі знайшлі легендарную цытадэль караля Давіда

• 6.05.2014, 18:54

Цытадэль, што згадваецца ў Бібліі, знойдзеная ў часе раскопак у Ерусаліме.

Ізраільскі археолаг Элі Шукрон кажа, што ён здолеў знайсці легендарную цытадэль, захопленую старажытнагабрэйскім каралём Давідам пры заваёве Ерусаліма блізу трох тысяч гадоў таму, піша «Корреспондет».

«Гэта цытадэль караля Давіда, гэта цытадэль Сіёна, тое, што кароль Давід адабраў у Евусэяў - дагабрэйскага насельніцтва Юдэі, якое заклала Ерусалім», - сказаў ён.

Паводле звестак АР, на раскопках здолелі выявіць абарончыя збудаванні, складзеныя з камянёў вагой пяць тон, а таксама рэшткі рова і тунэлю для падачы вады ў цытадэль.

Археолаг выявіў, што абарончыя муры былі збудаваныя блізу 3,8 тысяч гадоў таму - за 800 гадоў да захопу ўмацаванняў каралём Давідам. «Я ведаю кожную драбніцу Горада Давіда. Я не бачыў ніякага іншага месца, як гэтае, з гэткімі гіганцкімі фартыфікацыйнымі збудаваннямі», - дадаў Элі Шукрон.

Шукрон вядзе раскопкі Горада Давіда - найстарэйшага населенага раёна Ерусаліма на месцы старажытнага места Евусэяў з 1995 года. Заявы аб адкрыцці, зробленым Шукронам, выклікалі крытыку ў шэрагу спецыялістаў. Аднак большасць археолагаў ў Ізраілі не адмаўляюць існавання караля Давіда, але спрачаюцца аб прыналежнасці розных археалагічных аб'ектаў, знойдзеных у Ерусаліме, да эпохі легендарнага караля.

Давід панаваў блізу 1005 - 965 гг. да н.э. Прыкладна сем гадоў ён быў каралём Юдэі, а затым 33 гады - аб'яднанага каралеўства Ізраіля і Юдэі са сталіцай у Ерусаліме. Ягоны вобраз традыцыйна ўважаецца за прыклад ідэальнага кіраўніка. Згодна са старазапаветнымі прароцтвамі, з роду караля Давіда па мячы мусіў выйсці Мэсія.