Адэскія ВНУ спынілі заняткі да 12 траўня
- 5.05.2014, 20:10
Рада рэктараў вышэйшых навучальных устаноў Адэсы рэкамендаваў вышэйшым навучальным установам места прыпыніць навучальны працэс да 12 траўня.
Пра гэта гаворыцца ў афіцыйнай заяве, паведамляе мясцовы сайт «Думская».
Плануецца таксама ўзмацніць прапускны рэжым у інтэрнатах і рэкамендаваць студэнтам ўстрымацца ад удзелу ва ўсялякіх масавых акцыях. Іншагароднім студэнтам рэкамендуюць паехаць дадому на час вымушаных вакацый.
Нагадаем, 2 траўня ў Адэсе адбыліся сутыкненні - прарасейскія ваеўнікі напалі на шэсце патрыётаў Украіны. Паводле звестак пракуратуры, падчас пятнічных сутыкненняў і пажару ў Доме прафзвязаў загінулі 46 чалавек, больш за дзвесце звярнуліся па дапамогу ў медыцынскія ўстановы.
Паводле звестак СБУ, сутыкненні і непарадкі ў Адэсе з удзелам прадстаўнікоў незаконных вайсковых фармаванняў каардынаваліся з тэрыторыі непрызнанага Прыднястроўя дыверсійнымі групамі з РФ.
Пасля пятнічных падзей у Адэсе звольнены начальнік абласной міліцыі.