Дзеці захраслі ў будаўнічай люльцы на ўзроўні пятага паверха ў Гродна

• 5.05.2014, 13:39

Два гродзенскіх школьніка вырашылі пакатацца ў пад'ёмнай люльцы, пакінутай будаўнікамі, і захраслі на ўзроўні пятага паверха.

Гэта адбылося ў нядзелю ўвечары, 4 траўня.

Паводле інфармацыі Міністэрства па надзвычайных сітуацыях, у 17-16 у службу МНС Гродна паступіла паведамленне аб тым, што двое дзяцей знаходзяцца ў фасадным пад'ёмніку і не могуць самастойна спусціцца, піша БелаПАН.

Пад'ёмнік належыць рамонтна-будаўнічаму прадпрыемству, якое праводзіць работы па ўцяпленні фасада будынка. Дзеці забраліся ў яе, націснулі кнопку механізму ўздыму, але, спалохаўшыся, яны спынілі калыску на ўзроўні пятага паверха. Апусціць пад'ёмнік самастойна не змаглі.

Работнікі МНС знялі дзяцей на балкон пятага паверха. У медыцынскай дапамозе яны не мелі патрэбы.