Тры беларусы спрабавалі незаконна завезці з Украіны 1,5 тоны мяса

• 3.05.2014, 11:32

Тры жыхары Маларыцкага раёна хацелі незаконна ўвезці ў Беларусь з Украіны 1400 кг мяса, а затым прапаноўвалі супрацоўнікам памежнай службы хабар.

«У выніку правядзення комплексу аператыўна-вышуковых мерапрыемстваў супрацоўнікі органаў памежнай службы ў Маларыцкім раёне спынілі незаконную дзейнасць трох мясцовых жыхароў, якія перамяшчалі таварна-матэрыяльныя каштоўнасці праз дзяржаўную мяжу з Украіны ў Беларусь. Беларусы рухаліся на двух аўтамабілях, у якіх, як высветлілася пазней, перавозілі амаль 1400 кг мяса без дакументаў», - паведамілі агенцтву «Інтэрфакс-Захад» у прэс-службе Дзяржаўнага памежнага камітэта.

«Пры гэтым памежнікі, якія пераследавалі парушальнікаў, сутыкнуліся з іх нахабствам і залішняй самаўпэўненасцю: для спынення транспартных сродкаў давялося прымяняць зброю», - працягнулі ў прэс-службе.

Паводле інфармацыі Дзяржаўнага памежнага камітэта, папярэдняя сума ацэнкі таварна-матэрыяльных каштоўнасцяў склала Br63 млн.

Акрамя таго, адзначылі ў прэс-службе, «адзін з парушальнікаў загадзя паклапаціўся аб бяспечным, з яго пункту гледжання, зыходзе справы: ён некалькі раней прапанаваў хабар супрацоўніку памежнай службы».

У ГПК праінфармавалі, што мужчыне давядзецца несці крымінальную адказнасць за свае дзеянні.