Каля гіпермаркета Bigzz перакулілася маршрутка

• 28.05.2014, 11:37

Адзін чалавек дастаўлены ў лякарню.

Зараз праходзіць спецмерапрыемства «Аўтобус», асаблівая ўвага ў гэтыя дні надаецца маршруткам. Аднак нават узмацненне кантролю не змагло прадухіліць ДТЗ сёння каля гіпермаркета Bigzz. Раніцай там сутыкнуліся Honda Accord і Mercedes Sprinter. Мікрааўтобус перакуліўся, перадае з месца здарэння карэспандэнт onliner.by. Адзін чалавек быў дастаўлены ў лякарню.

Аварыя адбылася на рэгуляваным скрыжаванні. Паводле папярэдняй інфармацыі, аўтамабілі рухаліся перпендыкулярна адзін аднаму. Святлафоры ў гэты момант працавалі, сцвярджаюць відавочцы. Нам удалося пагаварыць з пасажырам Honda. Вось што ён паведаміў:

- Маршрутка ехала з боку вул. Мірашнічэнкі ў напрамку гіпермаркета. Мы рухаліся па мясцовым праездзе, з'язджалі з вонкавага боку МКАД. Мы рухаліся на зялёны сігнал святлафора, потым адбыўся ўдар. Адразу спыніліся некалькі чалавек, адзін з іх прапанаваў пакінуць запіс, зроблены рэгістратарам.

У Менскую абласную лякарню быў дастаўлены кіроўца Honda, у яго падазраюць пералом нагі.