Менчук: На павуцінні ў пад'ездзе гушкацца можна, як у гамаку
- 22.05.2014, 11:23
Тэма несвоечасовай уборкі пад'ездаў невычэрпная.
Педантычныя і не вельмі жыхары раз-пораз закідваюць камунальнікаў скаргамі. А менчук Віктар Траццякоў, стаміўшыся ад перапіскі з кіраўніцтвам ЖКГ, паспрабаваў вырашыць праблему праз дзяржаўную прэсу. Жыхар дома № 27/1 на вуліцы Русіянава прыйшоў да карэспандэнтаў «Вечернего Минска» з важкім стосам лістоў з ЖРЭА Першамайскага раёна і ЖЭУ-100, усе паперы - адказы на яго шматразовыя звароты. Пачалася перапіска яшчэ ў 2012 годзе, а воз і зараз там, сцвярджае Віктар Дзмітрыевіч.
- На павуцінні ў пад'ездзе гашкацца можна, як у гамаку, паўсюль бруд, разводы, плямы на падлозе, недакуркі валяюцца, - наракае суразмоўца. - Колькі ні звяртаўся ў ЖРЭА і ЖЭУ, дасылаюць адпіскі. Так, некалькі разоў прыходзіла камісія, правяралі стан, акты складалі. Але амаль заўсёды станоўчыя. Маўляў, вільготная ўборка праведзеная па графіку, павуцінне абмялі, дваровая тэрыторыя ў здавальняючым стане. Не ведаю, як такі стан можа задавальняць.
Але ж у медаля ёсць і адваротны бок: як вядома, чыста там, дзе не смецяць. І жыхары дамоў нясуць не меншую адказнасць за парадак на сваёй тэрыторыі, чым дворнікі.
- Уборку пад'ездаў у доме № 27/1 на вуліцы Русіянава праводзяць па зацверджаным графіку, - кажа намеснік дырэктара па добраўпарадкаванні і санітарным утрыманні жыллёвага фонду ЖРЭА Першамайскага раёна Аляксей Андрэеў. - Гэты дом, як і многія іншыя, пастаянна кантралюем у частцы санітарнага стану, і ён здавальняючы. Праўда, нярэдка толькі непасрэдна пасля ўборкі. Ужо на наступны дзень ад яе можа і следу не застацца. У сувязі з гэтым мы прапаноўвалі жыхарам звярнуцца ў ЖРЭА і заключыць дамову аб аказанні платных паслуг, каб уборку праводзілі часцей, калі той, што па графіку, недастаткова. Але такіх зваротаў не было.
Тут дарэчы заўважыць, што медаль і на рабро можа стаць. Цалкам зразумелая і такая пазіцыя таго ж Віктара Траццякова: «Калі я не смеціў, чаму павінен з-за іншых нядбайных жыхароў плаціць за дадатковую уборку?» Здавалася б, не хочаш плаціць - прад'яві прэтэнзіі суседзям, якія чыняць беспарадкі на сваёй тэрыторыі. Але падобная ініцыятыва пагражае наступствамі. Аднойчы Віктар Дзмітрыевіч зрабіў заўвагу двум несазнацельным таварышам, так ледзь уцёк. Кола замкнулася.