Камуністы і «рэгіяналы» байкатавалі прыняцце Радай антыкарупцыйных законаў
- 9.04.2014, 12:58
Рада не разгледзіць законапраекты аб правах грамадзян у барацьбе з карупцыяй і стварэнні Нацыянальнай антыкарупцыйнай службы.
Яны не набралі дастаткова галасоў, каб быць уключанымі ў парадак дня парламенцкага галасавання. За іх не прагаласавалі дэпутаты-камуністы і Партыя рэгіёнаў, перадае "5 канал".
Дэпутат ад партыі "Удар", кіраўнік камітэта па пытаннях барацьбы з арганізаванай злачыннасцю і карупцыяй Віктар Чумак, нагадаў, што закон аб антыкарупцыйнай структуры з'яўляецца неабходнай умовай для лібералізацыі візавага рэжыму з ЕЗ і асноўнай рэкамендацыяй GRECO для Украіны, без выканання якой атрымаць крэдыты ад еўрапейскіх арганізацый Украіне будзе складана, паведамляе Цензор.НЕТ.
Раней у гэты ж дзень, як паведамляе Украинская правда, на пасяджэнні Кабінета міністраў прэм'ер-міністр Арсеній Яцанюк звярнуўся да парламента з просьбай падтрымаць законапраект аб нацыянальнай антыкарупцыйнай службе - у прыватнасці, праект распрацаваны Міністэрствам юстыцыі і Урадавым упаўнаважаным па пытаннях антыкарупцыйнай палітыкі Таццянай Чарнавол.
Напярэдадні, 8 красавіка, пры галасаванні антыкарупцыйных законаў у пакеце законаў Рада таксама не змагла набраць неабходную колькасць галасоў і адхілены быў увесь пакет.