Невядомыя выкралі журналістку ў Каракасе

• 7.04.2014, 21:51

У сталіцы Венесуэлы невядомыя людзі выкралі журналістку буйнога тэлеканала Globovision Наіробі Пінто.

Пра гэта стала вядома з паведамленняў ейнага бацькі, паведамляе BBC.

Са слоў Луіса Пінта, узброеныя выкрадальнікі ў масках напалі на супрацоўніцу канала ў яе доме ў Каракасе ў нядзелю.

Выкраданні людзей для Венесуэлы не рэдкасць. За апошнія некалькі гадоў у краіне з мэтай выкупу былі выкрадзеныя некалькі вядомых дыпламатаў, бізнесоўцаў і спартоўцаў.

Высокі ўзровень гвалту, а таксама інфляцыя і крызіс з харчаваннем сталі прычынай масавых пратэстаў, якія доўжацца ў Венесуэле ўжо амаль два месяцы.